Trinidad, offisielt La Santísima Trinidad, er ein by i Bolivia og hovudstad i departementet Beni. Byen hadde eit estimert folketal på 130 000 i 2010. Han ligg i provinsen Cercado, ein av dei åtte provinsane i Beni.
Trinidad ligg ved den sørlege kanten av Amazonasbekkenet, på Moxos-slettene, og er knytt til Amazonas-vassdraget gjennom elva Mamoré. Klimaet er varmt og fuktig, med mykje nedbør i regntida og ein markert tørketid. Regionen er skogkledd og gjennomkryssa av store elvar i eit flatt landskap, alle ein del av Amazonasbekkenet. Trinidad er base for ei avdeling av den bolivianske marinen som opererer på elvane i landet.
Camba-spansk er det vanlegaste daglegspråket i byen, medan trinitario, ein dialekt av moxo-språka, er det viktigaste urfolksspråket.
Byen Trinidad vart grunnlagd i 1686, i 1769 vart han flytta om lag 14,5 km frå den opphavlege staden ved Mamoré på grunn av flaum og sjukdom. Som i mange andre bolivianske byar er sentrum organisert kring ein sentral plass med ein stor katolsk katedral. Den opphavlege misjonskyrkja vart riven og bygd opp att i 1923, men katedralen har framleis religiøse gjenstandar, måleri og statuar frå den eldre kyrkja.
Eit særmerkt trekk ved byen er eit dels opent dreneringssystem med grøfter langs kvart bykvartal. Dei er kopla til overbygde grøfter som leier vatnet ut i den lokale elva, og er nødvendige på grunn av den kraftige nedbøren frå desember til mai.
Byen har ei lufthamn og inngår i det nasjonale rutenettet i lufttransport. «Ruta 3» er eit 600 km langt vegsamband mellom Trindad og La Paz. «Ruta 9» gjev vegsamband med byen Guayaramerín nord i Beni-departementet, samt byar i tre andre departement: Santa Cruz, Chuquisaca og Tarija.
Klima Etter Köppen si klimaklassifisering har Trinidad eit tropisk monsunklima (Am), med ein lang regntid og ein kort tørketid. Byen er den departementshovudstaden i Bolivia som får mest nedbør. Årsnedbøren er meir enn 1400 mm høgare enn i La Paz, der han er om lag 600 mm.
Turisme Trinidad er omgjeven av elvar, innsjøar og lagunar. Området byr på båtturar, restaurantar og feriestader langs vassvegar. Byen har to museum. Museo Itícola, eit museum for fiskefauna, er det tredje største i sitt slag i Sør-Amerika og har over 400 fiskar frå innsjøar og lagunar i regionen. Det ligg på universitetsområdet til Universidad Autónoma del Beni og viser mellom anna små fiskar, pirajaar og ein boliviadelfin konservert i formaldehyd. Kenneth Lee etnoarkeologiske museum viser keramikk, reiskapar, verktøy, tekstilar og andre gjenstandar frå Moxos-kulturen.
Kjelder
Denne artikkelen bygger på «Trinidad, Beni» frå , den 27. oktober 2026
Bakgrunnsstoff
Kategori:Byar i Bolivia Kategori:Beni-departementet