Pio VI, nato Giannangelo Braschi (Cesena, 25 de diçenbre 1717 - Valence, 29 de agosto 1799), el xe sta papa dal 1775 alla sua morte.
Ła vita El Braschi el xe nato a Cesena (FC) el 27 de diçenbre 1717 dal conte Marco Aurelio Tommaso Braschi e da Anna Teresa Bandi. Dopo aver conseguio el dotorato in legge el se ga trasferìo a Ferara, dove el xe diventà segretario personałe del Cardinałe Ruffo, inte i cui vescovadi de Ostia e Velletri el ga coverto ła carica de uditore fin al 1753.
Ła so perisia inte el condure n'importante mision a ła corte de Napołi ła ghe xe servìa par guadagnarse ła stima de Benedetto XIV, che ło ga nominà so segretario e canonico de San Piero. Ntel 1758 Clemente XIII lo ga nominà prełato e inte el 1766 texoriere de ła camara apostołega. El 26 de apriłe 1773 el xe sta promoso Cardinale de Sant'Onofrio.
Eleto Papa inte el 1775, inte i ultimi ani de pontificato el se ga scontrà co ła Rivołusion Fransexe. Tuti i posedimenti de ła cexa in Fransa i xe sta confiscà e el so ritrato bruxà da ła foła inte el Pałaso Reałe de Parigi.
Inte el 1796 Napoleon el ga invadesto ł'Italia e costreto el papa a ł’umiliante armistisio de Bołogna: Pio VI el ga dovesto dare Bołogna, Ferara e Ancona, versare 21 miłioni de scudi e consegnare numeroxe opare d’arte. Quando po' el papa el se ga łigà co ł'Austria, che ła gera drio formare na coałision contro ła Fransa, Napoleon el xe riusio a portare da ła propria parte Ferdinando I de Napołi che, co on ato arbitrario, el ga ordinà de invadare i feudi papałi inte el so teritorio. Ł'esercito pontefiso el xe sta sconfito (10 de febraro 1797) e el 18 febraro i fransexi i ga sachejà el Santuario de Loreto. El Pontefice el xe sta perciò costreto a firmare el Tratato de Tolentino (febraro 1797), che el ghe xe costà altri 25 miłioni de scudi e numeroxi ogetti d’arte.
Ła situasion ła xe pejorà el 28 de diçenbre del steso ano, quando, inte el corso de on tumulto el generałe Duphot el xe sta copà, e questo el ga dà el pretesto ai fransexi par ocupare Roma.
El 15 de febraro 1798, el papa el xe sta deposto e proclamà ła republica.
Pio VI el xe sta fato subito prexoniero e, el 20 de febraro el xe sta scortà dal Vaticano a Siena, dove el xe restà tri mixi, e quindi a ła Certoxa de Firense, dove el xe sta segregà inte el convento. Inte el marso del 1799 el xe sta prima trasferio a Bologna, po' in Fransa, prima a Grenoble, po' el 19 de lujo el xe sta inciavà drento ła forteza de Valence, caołogo de ła Drôme. Pio VI el xe morto in prexon el 29 de agosto del steso ano.
Pio 06