«Sabbath Bloody Sabbath» er opningssporet og tittelsporet på albumet med same namn frå 1973 av det engelske heavy metal-bandet Black Sabbath. Singelen hadde «Changes» som B-side.
Hovudriffet er omtalt som «riffet som redda Black Sabbath», fordi Tony Iommi, som skreiv det meste av musikken til bandet, hadde hatt skrivesperre. For å gje han inspirasjon tok dei i bruk drastiske tiltak, mellom anna å leige det påstått heimsøkte Clearwell Castle for å bu der.
Hardrock- og heavy metal-gitaristar har trekt fram songen med ros. Slash frå Guns N’ Roses sa til Guitar World i 2008 at avslutninga på «Sabbath Bloody Sabbath» var det tyngste han nokon gong hadde høyrt, og at han framleis ikkje hadde høyrt noko like tungt med like mykje sjel. Den tidlegare Mastodon-gitaristen Brent Hinds sa til Nick Bowcott i 2008 at riffet med linja «dreams turn to nightmares, Heaven turns to Hell» på slutten av songen ikkje kunne overgåast.
Konsertversjonar Songen vart sjeldan spela på konsert i 1970-åra. Under Heaven & Hell Tour kom han attende på programmet i fleire konsertar, før han vart teken bort. På Cross Purposes-turneen avslutta han vanlegvis konsertane, medan han på Forbidden-turneen vart spela midt i settlista med ekstra gitarspel av Geoff Nicholls.
Under Reunion-turneen til bandet seint i 1990-åra vart songen spela i ei forkorta utgåve utan det siste verset, fordi vokalomfanget til Osbourne var vorte mindre. På seinare turnear og konsertar vart opningsriffet brukt som intro til «Paranoid».
Medverkande Opplysningane om medverkande er henta frå omslagsteksten til Sabbath Bloody Sabbath.
Tony Iommi – gitarar Ozzy Osbourne – vokal Bill Ward – trommer og perkusjon Geezer Butler – bass og fuzzbass
Versjonar av andre artistar Det amerikanske thrash metal-bandet Anthrax spelte inn songen. Versjonen er spor tre på EP-en I'm The Man frå 1987.
Det svenske popbandet The Cardigans spelte inn «Sabbath Bloody Sabbath» på debutalbumet Emmerdale.
Det svenske doom metal-bandet Candlemass spelte inn ein del av songen til ein Black Sabbath-medley på albumet Ancient Dreams frå 1988. Seinare spelte dei inn heile songen på EP-en Black Star frå 2025.
Det amerikanske noise rock-/eksperimentell metal-bandet Today Is the Day spelte inn songen. Versjonen kom på det tredje bandet i hyllestserien In These Black Days og på det fjerde studioalbumet til bandet, Temple of the Morning Star.
Mottaking «Sabbath Bloody Sabbath» vart rangert som den fjerde beste Black Sabbath-songen i Rock – Das Gesamtwerk der größten Rock-Acts im Check. Cash Box kalla han ei «heavy metal-utflukt inn i den hardtrockande verda til desse svært suksessrike britiske rockarane», men meinte at dei mjukare avbrota mellom dei tunge partia gjorde sporet til den sterkaste singelkandidaten Black Sabbath hadde hatt på ei stund.
Kjelder
Denne artikkelen bygger på «Sabbath Bloody Sabbath (song)» frå , den 6. september 2026.
Bakgrunnsstoff «Sabbath Bloody Sabbath» på YouTube
Kategori:Black Sabbath-songar Kategori:Singlar frå 1973 Kategori:Songar skrivne av Ozzy Osbourne Kategori:Songar skrivne av Tony Iommi Kategori:Songar skrivne av Geezer Butler Kategori:Songar skrivne av Bill Ward Kategori:Songar frå 1973 Kategori:Anthrax-songar Kategori:The Cardigans-songar Kategori:Candelmass-songar