Samira Efendijeva () er ein aserbajdsjansk songar. Ho brukar artistnamnet Efendi, tidlegare Samira Efendi. Ho skulle representere Aserbajdsjan i Eurovision Song Contest 2020 i Rotterdam i Nederland med songen «Cleopatra», men 18. mars 2020 avlyste EBU tevlinga på grunn av koronaviruspandemien i Europa vinteren 2020. I staden avgjorde den aserbajdsjanske kringkastaren İTV at Efendi skulle få representere Aserbajdsjan i 2021 med songen «Mata Hari».
Bakgrunn Efendijeva vart fødd og voks opp i den aserbajdsjanske hovudstaden Baku. Ho oppnådde popularitet i heimlandet etter å ha delteke i lokale og nasjonale songtevlingar som Yeni Ulduz (2009), Böyük Səhnə (2014) og The Voice of Azerbaijan (2015–2016), der ho vart nummer tre. I 2017 var ho den aserbajdsjanske representanten i vokalisttevlinga Silk Way Star, arrangert i Almaty i Kasakhstan, der ho kom på tredjeplass. Ho representerte nok ein gong Aserbajdsjan under songfestivalen Voice of Nur-Sultan i Nur-Sultan i Kasakhstan i 2019.
28. februar 2020 kunngjorde den aserbajdsjanske tv-kanalen İTV at ein jury hadde vald Efendi til å representere Aserbajdsjan i Eurovision Song Contest 2020 i Rotterdam i Nederland. Ho skulle opptre med songen «Cleopatra», men tevlinga vart avlyst på grunn av koronaviruspandemien i Europa vinteren 2020. Efendi representerte i staden Aserbajdsjan i Eurovision Song Contest i 2021 med «Mata Hari». Ho deltok i den fyrste semifinalen tysdag 18. mai og kvalifiserte seg til finalen laurdag 22. mai. Der kom ho på ein 20.-plass
Flørting med norske TIX Efendi gjorde seg merka i dagane før den fyrste semifinalen, etter at den norske deltakaren TIX sende fleire kjærleikserklæringar til ho via Instagram. Etter kvart svara ho på meldingane via eigne postar på Instagram. Sidan heldt dei to fram med å flørte via sosiale medium, og dei møttest til fleire dater i finaleveka. Flørtinga mellom dei to fekk stor merksemd hos presse, fans og arrangørar, og fekk sin eigen emneknagg på Instagram: Efentix. Enkelte pressefolk og fans spekulerte likevel på om flørtinga var eit PR-stunt for å skape merksemd, men TIX avviste dette i ein videofilm han la ut på sin eigen YouTube-konto.
Både Aserbajdsjan og Noreg deltok i den fyrste semifinalen og begge land kvalifiserte seg til finalen. Der hadde dei startnummer etter kvarandre.
Diskografi
Singlar TitlarÅrAlbum«Yarımın Yarı»2019 rowspan="5" «Sen Gelende»«Yol Ayrıcı»«Cleopatra»2020«Mata Hari»2021
Kjelder
Denne artikkelen bygger på «Samira Efendi» frå , den 21. juni 2021.
Kategori:Aserbajdsjanske musikarar Kategori:Aserbajdsjanske popsongarar Kategori:Aserbajdsjanske Eurovision Song Contest-deltakarar Kategori:Eurovision Song Contest 2020-deltakarar Kategori:Eurovision Song Contest 2021-deltakarar