Elling Mathias Holst () var ein norsk kjøpmann og stortingsmann frå Drammen. Han var medlem av jakobinarpartiet. Han var gift med ei halvsyster til eidsvollsmannen Carl Dahl.
Holst var fødd på Bragernes, der faren dreiv handel. Etter merkantil utdanning på Snowden institute i Hull, var han 1805-10 tilsett på kontoret til kjøpmann Jan Anker i Fredrikshald. Under krigen mot Sverige i 1808-09 gjekk han inn i militæravdelinga «Prins Christian August frivillige jægere» og var kaptein og sjef for avdelinga. I 1810 slo han seg ned i Bragernes der han var kjøpmann til han døydde. Han var i mange år forlikskommissær.
Holst var stortingsmann 1821 og 1822, på ny i 1827 og 1828 og endå ein gong i 1833. Også til Stortinget 1824 vart han vald til tingmann, men det valet vart forkasta. Han var i 1821 medlem i sju komitear, mellom dei Gasje-, pensjons- og konsumpsjonskomiteen, Komiteen om handelsmanns-rettar, Komiteen om korntollen og Komiteen om toll- og konsumpsjonvesenet. I 1827 var han medlem i Tollkomiteen, medan han på Omframtstortinget 1828 var med i Komiteen om vernepliktslova. På Stortinget 1833 var medlem av Lagtinget og Justiskomiteen.
Holst døydde i Drammen vinteren 1852, 66 år gammal.
Kjelder
Lindstøl, Tallak: Stortinget og Statsraadet 1814-1914. Kristiania, 1914
Kategori:Stortingsrepresentantar 1821-1823 Kategori:Stortingsrepresentantar 1827-1829 Kategori:Stortingsrepresentantar 1833-1835 Kategori:Folk frå Drammen